ការគ្រប់គ្រងអាជីវកម្ម

ចំនុចសាមញ្ញទាំងបួននៃការគ្រប់គ្រងអាជីវកម្ម

ការគ្រប់គ្រងអាជីវកម្មមួយ បើនិយាយអោយសាមញ្ញវាគ្រាន់តែជាស្ទីល មួយទេ។ ពីព្រោះថា យើងម្នាក់ៗអាចធ្វើយ៉ាងណាក៏បាន ទៅតាមការ ចូលចិត្តនិងចង់បានរៀងៗខ្លួន។ បើយើងក្រឡេកមើលតែមួយភ្លែត មានមនុស្សជាច្រើនតែងតែយល់ច្រឡំថា ការគ្រប់គ្រងអាជីវកម្ម មានលក្ខណៈស្មុគស្មាញខ្លាំងណាស់។ ផ្ទុយទៅវិញ ប្រសិនបើយើង ពិនិត្យអោយបានស៊ីជម្រៅតែបន្តិច ការគ្រប់គ្រងអាជីវកម្មមួយ វាពឹង ផ្អែកលើមូលដ្ឋានសាមញ្ញៗតែបួនចំនុចប៉ុណ្ណោះ មិនថាជាអាជីវកម្ម ប្រភេទអ្វី និងមានទំហំប៉ុណ្ណានោះទេ ហើយចំពោះចំនុចទាំងនោះ យើង នឹងលើកយកមកបកស្រាយ ដូចខាងក្រោមនេះ។

១-      ការរៀបចំផែនការ
នៅក្នុងពិភពនៃអាជីវកម្មសព្វថ្ងៃនេះ ការប្រកួតប្រជែងគ្នា គឺមានភាពកាន់តែតឹងតែងឡើងៗ។ ដូច្នេះដើម្បីធានានូវភាពជោគជ័យ និងអាចស្ថិតនៅលើគេបង្អស់នៃសៃហ្វៀនប្រកួតប្រជែងនេះ ម្ចាស់អាជីវកម្មស្ទើរតែទាំងអស់ គ្នា បានផ្តោតការយកចិត្តទុកដាក់ខ្ពស់ និងចាត់ទុកថាវាជាការចាំបាច់មួយ ក្នុងការរៀបចំអោយមានជាផែនការនានា ជាពិសេសគឺផែនការអាជីវកម្មតែម្តង។ ផែនការអាជីវកម្ម វាគឺជាឯកសារកត់ត្រាមួយដែលសរសេរអំពី ការប្រព្រឹត្តទៅនៃអាជីវកម្មមួយ។ វាជាការកត់ត្រាបញ្ចូលនូវគោលបំណង គោលដៅ និងការកំណត់ទិសដៅ ផែនការសកម្មភាពនានា ប្រតិបត្តិការ កិច្ចការហិរញ្ញវត្ថុ យុទ្ធសាស្រ្តនិងការព្យាករណ៍នៃដំណើរការទីផ្សារ និងសកម្មភាពនានារបស់អាជីវកម្ម។ល។ ការគ្រប់គ្រងគម្រោងអាជីវកម្មគឺជាដំណើរការមួយដែលត្រូវធ្វើជាប្រចាំ និងជានិរន្ត។

២-      ផ្នែកហិរញ្ញវត្ថុ
ផ្នែកហិរញ្ញវត្ថុ វាគឺជាប្រព័ន្ធសរសៃឈាមរបស់ក្រុមហ៊ុនមួយ មានន័យថា ភាពរស់រានមានជីវិតរបស់អាជីវកម្មមួយ វាពឹងផ្អែកទាំងស្រុង លើការគ្រប់គ្រងហិរញ្ញកិច្ច អោយបានល្អប្រសើរ។ ដោយមិនមានការកំហិតជាក់លាក់ណាមួយនោះទេ វាត្រូវបានរាប់បញ្ចូលនូវ ការគ្រប់គ្រងថវិការ ចំណូលបានមកពីការលក់ ការចំណាយថ្លៃដើម ការចំណាយប្រតិបត្តិការ ព្រមទាំងការទទួលខុសត្រូវមួយចំនួន ទៀត។ ជាទូទៅ អាជីវកម្មមួយដែលដំណើរការទៅបានជោគជ័យ ត្រូវបានស្តែងឡើងដោយសារ វាមានលទ្ធភាពក្នុងការបង្កើតនូវ ចរន្តសាច់ប្រាក់ល្អនិងជាវិជ្ជមាន។

៣-      ការរៀបចំបុគ្គលិក
ចំនុចមួយផ្សេងទៀតក្នុងការគ្រប់គ្រងអាជីកម្មគឺការចាត់ចែងបុគ្គលិក។ យើងពុំចាំបាច់មានការភា្ញក់ផ្តើលអ្វីទេ នៅពេលដែលបានឮ អាជីវករមួយចំនួននិយាយ ត្អូញត្អែអំពីចំណោទរបស់ពួកគេក្នុងការស្វែងរក ក៏ដូចជាការបណ្តុះបណ្តាលនិយោជិក។ ការរកបាន បុគ្គលិកល្អ ស្មោះត្រង់ យកចិត្តទុកដាក់លើការងារ និងធ្វើការបានលទ្ធផលល្អ គឺជាកត្តារស់រានរបស់អាជីវកម្មមួយ ដែលម្ចាស់ ក្រុមហ៊ុនគ្រប់រូបតែងតែប៉ងប្រាថ្នា។

៤-      ការបំពេញមុខងារ
ការធ្វើជំនួញបើនិយាយទៅគឺសំដៅលើការបំពេញមុខងារទាំងឡាយ។ ដោយរាប់បញ្ចូល ចាប់ពីម្ចាស់ក្រុមហ៊ុន គណៈគ្រប់គ្រង ជាន់ខ្ពស់ រហូតដល់បុគ្គលិក ឫកម្មករថ្មីថ្មោង គឺចាំបាច់តម្រូវអោយមាននូវការតាមដានលើការបំពេញភារកិច្ចអោយ បានខ្ជាប់ខ្ជួន និងជាប្រចាំ ធ្វើដូច្នេះគឺដើម្បីអោយបានសម្រេចនូវគោលបំណង ក៏ដូចជាបានឈានឆ្ពោះដល់គោលដៅនៃសកម្មភាពអាជីវកម្មនានា ដែលបានគ្រោងទុក។ និយាយរួម វាគឺជាការត្រួតពិនិត្យ ការវាយតំលៃ និងការតាមដាននូវគម្រោង និងសកម្មភាពនានា ដោយធ្វើ ការប្រៀបធៀបនឹងផែនការដែលបានលើកឡើង ដើម្បីពិនិត្យអោយឃើញនូវលទ្ធផលការងារដែលបានអនុវត្តន៍ដោយអ្នកទទួល ខុសត្រូវទាំងពួង ថាតើមានការទទួលបាននូវលទ្ធផលដូចដែលបានកំណត់ដែរឫទេ។

ដូចដែលបានរៀបរាប់មកខាងលើ ការគ្រប់គ្រងអាជីវកម្មឫក្រុមហ៊ុនមួយ គឺមិនមានភាពស្មុកស្មាញដូចដែលយើងភាគច្រើន បានគិតនោះទេ ពីព្រោះជាគោលការណ៍ វាគឺជាការរួមបញ្ចូលគ្នារវាងការធ្វើផែនការ ការគ្រប់គ្រងហិរញ្ញកិច្ច ការចាត់ចែងបុគ្គលិក និងការដឹកនាំនូវការបំពេញតួនាទីទាំងឡាយ។